ASAL USUL DESA TALAGENING Kelas 8
Teks Legendha 2
ASAL USUL DESA TALAGENING
Kocap kacarita neng zaman gemiyen pejajah Belanda seneng nyampuri
urusan keraton. Saengga Kasultanan Yogyakarta dipecah dadi loro yakuwe
Kasultanan Hadiningrat lan Daerah Pakualaman.Penjajah Belanda licik nganggo
politik Devide At Impera yakuwe politik memecah belah utawa adu domba, saengga
kulawarga keraton akeh sing ora marem, pungkasane akeh sing padha ngungsi,
kulawarga raja apa dene para prajurit ninggalaken keraton nganti tekan pelosok lan
padukuhan.
Al kisah ana 2 ( loro ) prajurit keraton sing esih kakang adhi , kanthi aran
Nalaita lan Sabdaita sing lunga sekang keraton. Kelorone tekan neng sawijining
panggonan tuk utawa sumber banyu sing banyune bening banget lan tuke gedhe.
Merga saking kesele kelorone ngaso neng ngisor wit weringin sing iyub banget.
Nalaita lan Sabdaita ngresiki tuk utawa sumber banyu kasebut saengga
banyune ketampung sangsaya amba memper telaga. Panggonan ngaso kasebut dening
wong loro kuwe mau dearani Tlaga - yasa. Tlaga tegese sumber banyu utawa tuk,
yasa tegese gawe. Saengga Tlaga yasa tegese tlaga sing degawe.
Sebanjure Nalaita babad/nyambut gawe babad alas maring sisih kulon, tekan
maring sumber banyu utawa tuk sing banyune bening. Tuke lewih sekang siji lan
panggonane adoh-adohan utawa arang, neng ngisore wit Lemberang sing dhuwur
banget lan wit weringin. Mulane tuk mau dearani Kali Lemberang, tuke pating
slember tapi arang-arang, dadi Lemberang.
Nalaita nerusake mbabad maring ngulon, neng sawijining wektu ngaso neng
ngisor wit sing iyub arane wit Kedawung. Papan kono banjur dearani Kedawung.
Sebanjure nerusake babad tekan neng pinggir kali gedhe sing kondhang arane kali
Soso. Kali Soso ana cabange loro lan ilene banyu kali ketemu neng siji panggonan
ilenen banyu kasebut. Saengga panggonan sing deapit ilene kali memper karo pulo
(nusa), neng panggonan kuwe akeh tanduran kembang, kayata kembang mawar lan
sapanunggalane. Mula panggonan kuwe dearani Nusa Kembang. Nusa tegese pulo,
kembang tegese bunga/sekar. Neng tengah-tengahe ana petilasan kaya
makam/kuburan, dening wong-wong dikeramatna lan desebut-sebut Candi
Supiturang amarga deapit neng loro ilen kali kasebut, panggonan kuwe esih ana
gandheng cenenge karo crita Cindeleres, sing jagone jenenge Wiring Galih.
Sewise Nalaita rumangsa cukup olehe mbabadi alas kanggo gawe padhusunan,
papan panggonan kuwe banjur dearani Tlaga – bening, artine tlaga sing bening
(jernih). Suwe suwe aran Tlaga bening dadi Talagening.
Mangkana cerita asal usul jeneng Tlagayasa lan Talagening. Nalaita banjur
seda lan disarekake neng Pesarean Talagening minangka Pesarean Lugu ( pertama ).
Dene Sabdaita seda banjur disarekake neng Pesarean Tlagayasa uga minangka
Pesarean Lugu ( pertama ). Mula ana kapercayan utawa kayakinan menawa wong
Tlagayasa pernah sedulur tuwa maring wong Talagening. Desa Tlagayasa lan
Talagening kuwe manggon neng kecamatan Bobotsari Kabupaten Pubalingga.
Posting Komentar untuk "ASAL USUL DESA TALAGENING Kelas 8"